នៅព្រឹកថ្ងៃអង្គារ ៧រោច ខែជេស្ឋ ឆ្នាំខាល ចត្វាស័ក ព.ស ២៥៦៦ ត្រូវនឹង ថ្ងៃទី២១ ខែមិថុនា ឆ្នាំ២០២២ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានអញ្ជើញចូលរួមជាអធិបតីក្នុងពិធីប្រគល់សញ្ញាបត្រ ថ្នាក់បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ ជូនដល់និស្សិតសាកលវិទ្យាល័យជាតិបាត់ដំបង សរុបចំនួន៦០៤នាក់ ស្រី ៣១០នាក់ ក្រោមអធិបតីភាពដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ ដែលពិធីនេះរៀបចំឡើងនៅសាលសន្និសីទមហានគរ នៃសាកលវិទ្យាល័យជាតិបាត់ដំបង ។
នៅក្នុងឱកាសពិធីនេះដែរ ក៏មានការអញ្ជើញចូលរួមពី ឯកឧត្តម យក់ ង៉ុយ រដ្ឋលេខាធិការ ក្រសួងអប់រំ យុវជន និងកីឡា តំណាងឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្ដីក្រសួងអប់រំ យុវជន និងកីឡា ឯកឧត្តម ស សុខា រដ្ឋលេខាធិការ ក្រសួងអប់រំ យុវជន និងកីឡា និងជាប្រធានគណៈកម្មការគ្រប់គ្រងសាកលវិទ្យាល័យជាតិបាត់ដំបង ព្រមទាំងឯកឧត្តម លោកជំទាវ អស់លោក លោកស្រីជាថ្នាក់ដឹកនាំ ព្រមទាំងគណៈគ្រប់គ្រង មន្ត្រី បុគ្គលិក គ្រូបង្រៀន និងនិស្សិតជយ័លាភីបានចូលរួមផងដែរ ។
ឯកឧត្ដម សុខ ឃន សាកលវិទ្យាធិការនៃសាកលវិទ្យាល័យជាតិបាត់ដំបង បានមានប្រសាសន៍ថា បើគិតចាប់ពីឆ្នាំ២០០៨មក សាកលវិទ្យាល័យបានបណ្តុះបណ្តាលនិស្សិតចំនួនជាង២០,០០០នាក់ ដែលជាធនធានមនុស្សរបស់ជាតិក្នុងការចូលរួមចំណែកអភិវឌ្ឍសេដ្ឋកិច្ចជាតិ ដែលក្នុងនោះមាននៅក្នុងស្ថាប័នសាធារណៈ និងឯកជនប្រមាណជា៩០%ក្នុងវិស័យសំខាន់ៗដូចជា វិស័យអប់រំ សេដ្ឋកិច្ច ពាណិជ្ជកម្ម កសិកម្ម ជីវចម្រុះ ទេសចរណ៍ ធនាគារ បដិសណ្ឋារកិច្ច បច្ចេកវិទ្យា និងសំណង់ស៊ីវិលជាដើម។ ឯកឧត្តមបានបន្តទៀតថា ក្នុងឆ្នាំសិក្សា ថ្មីនេះមានសិស្សបានចុះឈ្មោះចូលរៀនមានចំនួនកើនឡើងគួរឱ្យកត់សម្គាល់ ដែលកំពុងសិក្សាលើជំនាញឯកទេសសរុបចំនួន៣៩ ហើយនៅក្នុងឆ្នាំ២០២២នេះ សាកលវិទ្យាល័យមាននិស្សិតចំនួន៤,៥៨៩នាក់ ស្រីចំនួន២,៧២២នាក់ ដោយក្នុងនោះសាកលវិទ្យាល័យ បានបំពាក់សម្ភារសិក្សាមួយចំនួន ស្របតាមតម្រូវការជាក់ស្ដែងដើម្បីប្រែក្លាយទៅជាសាកលវិទ្យាល័យបៃតង បរិស្ថានសិក្សាល្អ និងស្របតាមស្ដង់ដាគុណភាពកម្រិតជាតិ-អន្តរជាតិ។
សម្តេចក្រឡាហោម ស ខេង ឧបនាយករដ្ឋមន្រ្ដី រដ្ឋមន្រ្ដីក្រសួងមហាផ្ទៃ បានអញ្ជើញមានប្រសាសន៍ថ្លែងអំណរគុណចំពោះអាជ្ញាធរខេត្តបាត់ដំបង ដែលបានផ្ដល់កិច្ចសហការល្អជាមួយនឹងសាកលវិទ្យាល័យកន្លងមក និងសូមកោតសរសើរដោយស្មោះចំពោះគណៈគ្រប់គ្រង មន្ត្រី បុគ្គលិក គ្រូបង្រៀន និងដៃគូសហប្រតិបត្តិការទាំងអស់របស់សាកលវិទ្យាល័យជាតិបាត់ដំបង ដែលបានខិតខំបំពេញតួនាទីភារកិច្ចរបស់ខ្លួន ប្រកបដោយស្មារតីទទួលខុសត្រូវខ្ពស់ក្នុងការបណ្ដុះ បណ្ដាល និងស្រាវជ្រាវដើម្បីបណ្តុះបណ្តាលធនធានមនុស្សប្រកបដោយគុណភាព និងសក្តានុពលភាពឆ្លើយតបទៅនឹងតម្រូវការទីផ្សារការងារ និងសង្គមជាតិ។ សម្តេចក្រឡាហោម បានបន្តទៀតថា គុណភាពនៃការអប់រំបណ្តុះបណ្តាល គឺជាកត្ដាអាទិភាពសំខាន់បំផុត ដែលគ្រប់ភាគីពាក់ព័ន្ធទាំងអស់ត្រូវរួមគ្នាឱ្យតម្លៃ រួមគ្នាទទួលខុសត្រូវ និងរួមគ្នាប្ដេជ្ញាចិត្តធ្វើឱ្យបានក្នុងការបណ្តុះបណ្តាលធនធានមនុស្សប្រកបដោយសមត្ថភាព មនសិការ ក្រមសីលធម៌វិជ្ជាជីវៈ ដែលអាចបំពេញការងារ បានស្រប តាមតម្រូវការ នៃស្ថាប័ននិយោជកទាំង វិស័យសាធារណៈនិងវិស័យឯកជន»។
សម្តេចក្រឡាហោម ក៏បានមានប្រសាសន៍ណែនាំនិងផ្ដាំផ្ញើដល់គណៈកម្មការគ្រប់គ្រងសាកលវិទ្យាល័យជាតិបាត់ដំបង ឱ្យបន្តបំពេញភារកិច្ចរបស់ខ្លួនស្របតាមផែនការសកម្មភាពដែលបានកំណត់ ដើម្បីធ្វើកំណែ ទម្រង់និងជំរុញការអភិវឌ្ឍសាកលវិទ្យាល័យ ព្រមទាំងបន្តណែនាំតម្រង់ទិសដល់សាកលវិទ្យាល័យជាតិបាត់ដំបង លើការងារដឹកនាំ គ្រប់គ្រង ការងារបច្ចេកទេស និងការងារធានាគុណភាពអប់រំឱ្យស្របតាមស្ដង់ដាជាតិ និងអន្តរជាតិ។ សាកលវិទ្យាល័យជាតិបាត់ដំបង ត្រូវបន្តចូលរួមចំណែកបណ្តុះបណ្តាលធនធានមនុស្សប្រកបដោយគុណភាព សមត្ថភាព ចំណេះដឹង ចំណេះធ្វើ និងសីលធម៌ល្អ ដើម្បីសម្របខ្លួននៅក្នុងសង្គមពុទ្ធិ ព្រមទាំងបន្តអភិវឌ្ឍសមត្ថភាពគ្រូបង្រៀនតាមរយៈការបង្កើនកម្រិតគុណវុឌ្ឍិ ពង្រឹងក្រមសីលធម៌វិជ្ជាជីវៈ និងជំរុញការសិក្សាស្រាវជ្រាវបន្ថែមទៀត។ សម្តេច ក៏បានផ្តាំផ្ញើ ណែនាំក្មួយៗនិស្សិតជ័យលាភីឱ្យបន្តខិតខំប្រឹងប្រែងសិក្សាស្រាវជ្រាវនិងអភិវឌ្ឍខ្លួនជាប្រចាំ បន្តការរៀនសូត្រពេញមួយជីវិត លើជំនាញផ្សេងៗបន្ថែមទៀត ដើម្បីឱ្យមានសមត្ថភាពពេញលេញស្របតាមទីផ្សារការងារនិងការរីកចម្រើនរបស់ប្រទេសជាតិ ជាពិសេសត្រូវប្រកាន់ខ្ជាប់នូវក្រមសីលធម៌ និងសិល្បៈនៃការរស់នៅក្នុងសង្គម ដែលជាសសរស្តម្ភយ៉ាងសំខាន់ចាំបាច់សម្រាប់ អនាគតរបស់ក្មួយៗនិងសង្គមជាតិ ៕
