រដ្ឋបាលខេត្តបាត់ដំបង

Battambang Administration

រដ្ឋបាលខេត្តបាត់ដំបង

Battambang Administration

ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ

ជំនន់ទឹកភ្លៀងធ្វើឲ្យលិចលង់នៅស្រុកគាស់ក្រឡ ដែលជាស្រុកមួយតែងជួបបញ្ហាគ្រោះរាំងស្ងួត

ដោយ Sotheavyចំនួនទស្សនា (650)

បញ្ហាជំនន់ទឹកភ្លៀងនាចុងរដូវវស្សា ក្នុងឆ្នាំ២០២០នេះ មិនត្រឹមតែបង្កឲ្យមានការជន់លិចនៅតាមបណ្ដាស្រុកជាប់នឹងស្ទឹងធំៗក្នុងខេត្ត ឬស្រុកជាប់ព្រំដែនថៃនោះទេ វាក៏បានបង្កឲ្យមានការលិចលង់ និងប៉ះពាល់ដល់ស្រុកគាស់ក្រឡ ដែលជាស្រុកមួយតែងជួបបញ្ហាគ្រោះរាំងស្ងួតសឹងរាល់ឆ្នាំ និងមានស្ថានដីខ្ពស់មិនងាយមានទឹកជំនន់ហូរដល់ ស្ទើរតែគ្រប់ឃុំ ។

ដោយទឹកជំនន់ហូរដល់ស្រុកគាស់ក្រឡនេះ គឺហូរចេញពីស្រុកសង្កែ និងស្រុកបាណន់ ព្រោះថា ស្រុកទាំងពីរនេះ កំពុងជួបបញ្ហាគ្រោះទឹកជំនន់ធ្ងន់ធ្ងរផងដែរ ក្នុងចំណោមបណ្ដាក្រុង និងស្រុកមួយចំនួនទៀត ។
លោក ញឹក សារ៉ែន អភិបាលស្តីទីស្រុកគាស់ក្រឡ បានលើកឡើងថា ទឹកជំនន់នាពេលនេះ បានប៉ះពាល់ខ្លាំងនៅក្នុងឃុំហប់ រហូតដល់មានការលិចលង់ផ្ទះពលរដ្ឋចំនួន៧៩គ្រួសារ និងត្រូវបានអាជ្ញាធរ និងកងកម្លាំងទាំង៣ បានជួយអន្តរាគមន៍យកមកកាន់ទីទួលសុវត្ថិភាព ដោយមិនមានអ្នគ្រោះថ្នាក់ដល់អាយុជីវិតនោះទេ ។

លោកអភិបាលស្រុកស្តីទី បានបញ្ជាក់ថា ចំពោះទឹកជំនន់នេះ ក៏បានហូរចូលក្នុងស្រះទឹកធំៗក្នុងស្រុកទាំងមូល ដើម្បីទុកសម្រាប់ឲ្យពលរដ្ឋប្រើប្រាស់ក្នុងរដូវប្រាំងនាពេលខាងមុខ ហើយកម្រិតទឹកដែលចូលក្នុងស្រះទឹកទាំងអស់នោះ នឹងធ្វើឲ្យស្រុកគាស់ក្រឡ ដោះស្រាយបញ្ហាខ្វះខាតទឹកប្រើប្រាស់បានមួយផ្នែកធំផងដែរ ។

ពលរដ្ឋជួបគ្រោះទឹកជំនន់ រស់នៅក្នុងឃុំហប់ បានលើកឡើងថា ក្នុងតំបន់ពួកគាត់រស់នៅមិនដែលជួបបញ្ហាគ្រោះទឹកជំនន់ដូចឆ្នាំនេះទេ ដោយវាបានឡើងខ្លាំងជាង ឆ្នាំ២០១៣ទៅទៀត និងបណ្ដាលឲ្យមានការលិចលង់ផ្ទះសម្បែង ស្រែចម្ការ រួមទាំងផ្លូវមួយចំនួន ធ្វើឲ្យពួកគាត់ពិបាកក្នុងការធ្វើដំណើរ ប៉ុន្តែយ៉ាងណាក៏អរគុណដល់អាជ្ញាធរស្រុក និងកងកម្លាំងនានា ដែលបានជួយអន្តរាគមន៍នាំពួកគាត់មកកាន់ទីទួលសុវត្ថិភាព ។

ក្នុងពេលចុះចែកស្បៀងសង្គ្រោះបឋមដល់ពលរដ្ឋរងគ្រោះដោយជំនន់ទឹកភ្លៀង ក្នុងស្រុកគាស់ក្រឡ និងស្រុកសង្កែ នៅថ្ងៃទី១២ ខែតុលា ឆ្នាំ២០២០ ឯកឧត្តម ងួន រតនៈ អភិបាលខេត្តបាត់ដំបង អំពានវនាវពលរដ្ឋទាំងអស់ត្រូវមានការប្រុងប្រយ័ត្នខ្ពស់ចំពោះកូនចៅដោយត្រូវហាមមិនឲ្យលេងទឹកផ្ដេសផ្ដាស់ ខាងមានគ្រោះថ្នាក់ជាយថាហេតុ និងត្រូវនាំគ្នាថែរក្សាសុខភាព ។

ឯកឧត្តមអភិបាលខេត្ត បានបញ្ជាក់ថា ចំពោះទឹកជំនន់នៅខេត្តបាត់ដំបង គិតត្រឹមថ្ងៃទី១២តុលា មានស្រុកមួយចំនួនបានធូរស្បើយ ខណៈមួយចំនួនទៀតនៅធ្ងន់ធ្ងរនៅឡើយ ពិសេសស្រុកនៅខាងក្រោមៗស្ទឹងធំៗ ដោយអាជ្ញាធរខេត្ត កំពុងជួយសង្គ្រោះពលរដ្ឋ នាំទៅកាន់ទីទួលសុវត្ថិភាព រួមទាំងផ្ដល់នូវស្បៀងអាហារ និងថ្នាំសង្កូវជូនដល់ពលរដ្ឋ ហើយចំពោះស្ថានភាពទឹកជំនន់នៅស្ទឹងសង្កែ ក៏បានស្រកបន្តិចដែរ ៕

បណ្ណាល័យព័ត៌មាន
សេវាពេញនិយម
សេវាថ្មីៗ
លេខអគ្គិភ័យ016 717 129
017 448 348
លេខសង្គ្រោះគ្រោះថ្នាក់ចរារចរណ៍015 836 969
077​ 747 496
លេខទទួលព័ត៌មាន(ប៉ូលីស)0977780014

BATTAMBANG WEATHER

ព័ត៌មានជាប់ទាក់ទង

ផ្លូវលេខ 1, ទល់មុខស្ពានថ្មចាស់បាត់ដំបង

អ៊ីមែល : info@battambang.gov.kh

លេខទូរស័ព្ទ : (+855)53 732 137

© 2020

រក្សាសិទ្ធិគ្រប់យ៉ាងដោយ៖ រដ្ឋបាលខេត្តបាត់ដំបង

កែប្រែចុងក្រោយ : 7 ម៉ោងមុន