នៅព្រឹកថ្ងៃសៅរ៍ ១១រោច ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៨ ខែ កញ្ញា ឆ្នាំ២០២៤ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងលោកជំទាវ ព្រមទាំងមន្រ្ដីរាជការខេត្តស្រុក…បានអញ្ជើញជាអធិបតីភាពក្នុងពិធីសម្ពោធផ្លូវបេតុងចំនួន ៥ខ្សែ ដែលបានសាងសង់រួចមានប្រវែង ១៨៨៣ម៉ែត្រ ក្នុងនោះ ផ្លូវប្រវែង ១.០៣៥ម៉ែត្រ ទទឹង ៦ម៉ែត្រ និងផ្លូវប្រវែង៨៤៨ម៉ែត្រ ទទឹង៥ម៉ែត្រ ព្រមទាំងដាក់បង្គោលភ្លើងសូឡា ចំនួន១០០ ដើម និងមានដាំដើមឈើលម្អសងខាងផ្លូវ ស្ថិតក្នុងភូមិសង្កែវារ ឃុំបវេល ស្រុកបវេល ខេត្តបាត់ដំបង។
ឯកឧត្តម សុខលូ បានផ្ដាំផ្ញើ ដល់ប្រជាពលរដ្ឋ ដែលរស់នៅ រ៉បផ្លូវបេតុង ទាំង ៥ ខ្សែនេះថា ផ្លូវទាំងប្រាំខ្សែ ក្នុងភូមិសង្កែវារនេះ គឺមានដាំដើមឈើ អមសងខាងផ្លូវ ហើយដើមឈើទាំងនេះ ឯកឧត្តម សុំឲ្យប្រជាពលរដ្ឋ ជួយមើលថែរក្សាការពារ ស្រោចទឹក ធ្វើយ៉ាងណាឱ្យបានរស់ ចេញពណ៌ខៀវស្រស់បំព្រង ដែលជាផ្នែកមួយ ជួយលម្អដល់ភូមិដ្ឋានរបស់យើង ក៏ដូចជាចូលរួម ការពារបរិស្ថាន អនាម័យ សម្រាប់សុខភាព ប្រជាពលរដ្ឋក្នុងមូលដ្ឋានយើងនេះទៀតផងដែរ។
ឆ្លៀតក្នុងឱកាសនោះផងដែរ ឯកឧត្តម សុខ លូ និងលោកជំទាវ ក៏បានប្រគេនទេយ្យទានដល់ព្រះសង្ឃដែលគង់នៅវត្តពោធិរង្សីវឌ្ឍនារាម (ហៅវត្តសង្កែវារ) និងជួបសំណេះសំណាលសួរសុខទុក្ខ នាំយកអំណោយប្រគល់ជូន លោកតា លោកយាយ ចាស់ជរា ស្រ្ដីមេម៉ាយ និងគ្រួសារដែលមានជីវភាពខ្វះខាត ចំនួន១០០គ្រសារ ដោយក្នុងមួយគ្រួសារៗទទួលបាន អង្ករ ២៥ គីឡូក្រាម មីមួយកេស ទឹកបរិសុទ្ធមួយកេស ត្រីខកំប៉ុងមួយយួរ ទឹកស៊ីអ៊ីវមួយយួរ និងទឹកត្រីមួយយួរ៕
