នៅព្រឹកថ្ងៃព្រហស្បតិ៍ ១៣រោច ខែស្រាពណ៍ ឆ្នាំខាល ចត្វាស័ក ព.ស ២៥៦៦ ត្រូវនឹង ថ្ងៃទី២៥ ខែសីហា ឆ្នាំ២០២២ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង បានបន្តអញ្ជើញដឹកនាំក្រុមការងារជំនាញ ចុះពិនិត្យទីតាំងសម្រាប់រៀបចំការដាំបង្គោលភ្លើងបំភ្លឺតាមសួនសាធារណៈបន្ថែមទៀត ដើម្បីឲ្យសួនច្បារកាន់តែភ្លឺជាងមុន និងបន្តអញ្ជើញពិនិត្យមើលការកែលំអច្រាំង និងសួនច្បារ ដែលនឹងរៀបចំកែលំអរនាពេលអនាគត ដើម្បីសោភ័ណក្រុងបាត់ដំបងឱ្យកាន់តែស្រស់ស្អាតផងដែរ ។ ឯកឧត្តម ក៏បានមានប្រសាសន៍ដល់ក្រុមការងារក្នុងការរួសរាន់ការដាំបង្គោលភ្លើងតាមសួនសាធារណៈឱ្យបានឆាប់រហ័ស មុនពេលពិធីបុណ្យអុំទូកបណ្ដែតប្រទីប ខេត្តបាត់ដំបង នាពេលខាងមុខនេះ ដើម្បីត្រៀមទទួលលក្ខណៈស្វាគមន៍ភ្ញៀវទេសចរជាតិ និងអន្តរជាតិមកទស្សនាខេត្តបាត់ដំបងនាឱកាសនោះ ។ បន្ទាប់ពីនោះ ឯកឧត្តម និងក្រុមការងារបន្តពិនិត្យមើលសណ្ដាប់ធ្នាប់នៅក្នុងមន្ទីរពេទ្យបង្អែកខេត្តបាត់ដំបង និងពិនិត្យការជួសជុលផ្លូវថ្នល់នានាក្នុងក្រុងបាត់ដំបង ៕