រដ្ឋបាលខេត្តបាត់ដំបង
Battambang Administrationឯកឧត្តម ងួន រតនៈ បន្តអញ្ជើញចុះត្រួតពិនិត្យស្ថានភាពផ្លូវក្នុងភូមិជាច្រើនកន្លែង ដើម្បីលើកជាគម្រោងស្នើសុំថវិកាជាតិ ក្នុងការក្រាលកៅស៊ូឲ្យប្រជាពលរដ្ឋប្រើប្រាស់
នៅរសៀលថ្ងៃពុធ ២រោច ខែមិគសិរ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០២ ខែធ្នូ ឆ្នាំ២០២០ ឯកឧត្តម ងួន រតនៈ អភិបាល នៃគណៈអភិបាលខេត្ត អញ្ជើញដឹកនាំក្រុមការងារ ចុះត្រួតពិនិត្យស្ថានភាពផ្លូវក្នុងភូមិជាច្រើនខ្សែ ដើម្បីដាក់បញ្ចូលក្នុងការស្នើថវិកាជាតិ ក្នុងការជួសជុល និងស្ដារឡើងវិញនូវផ្លូវក្នុងភូមិដែលខូចខាត និងដើម្បីចាក់កៅស៊ូប្រភេទDBST ហើយជាពិសេសដើម្បីលើកសោភ័ណភាពផ្លូវក្នុងក្រុងបាត់ដំបងឲ្យកាន់តែប្រសើរឡើង សម្រួលដល់ការប្រើប្រាស់របស់ប្រជាពលរដ្ឋ ការដឹកជញ្ជូនទំនិញ និងដើម្បីទាក់ទាញភ្ញៀវទេសចរណ៍ឲ្យមកទស្សនាខេត្តបាត់ដំបងកាន់តែច្រើន ។
គួរបញ្ជាក់ផងដែរថា ការចុះត្រួតពិនិត្យស្ថានភាពផ្លូវ ដែលគ្រោងនឹងធ្វើការស្នើថវិកាជាតិ សម្រាប់ស្ដារ ជួសជុលផ្លូវ និងចាក់កៅស៊ូប្រភេទDBST មានទីតាំងដូចជា ផ្លូវខាងលិចផ្សារបឹងរាំង ឆ្លងកាត់ភូមិបឹងរាំង ភូមិដាក់សសរ ស្ថិតក្នុងសង្កាត់អូរម៉ាល់ ក្រុងបាត់ដំបង ដែលមានប្រវែង២,៩២០ម៉ែត្រ ទទឹង៤ម៉ែត្រ និងដាក់លូកាត់ផ្លូវចំនួន៦កន្លែង ដែលមានមុខកាត់៨០ ។ ចំពោះទីតាំង២ គឺស្ថិតក្នុងភូមិខ្សាច់ពោយ និងភូមិបល្ល័ង្គ សង្កាត់វត្តគរ ក្រុងបាត់ដំបង ដែលមានប្រវែង៧,៦៦០ម៉ែត្រ និងទទឹង៤ម៉ែត្រ ។
បន្ទាប់ពីធ្វើការត្រួតពិនិត្យស្ថានភាពផ្លូវ២ទីតាំងខាងលើហើយ ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង ក៏បានចុះពិនិត្យផ្លូវក្រាលកៅស៊ូប្រភេទ DBST ផ្លូវលេខ១,៥១២ ចាប់ពីផ្លូវជាតិលេខ៥៧ ដល់ផ្លូវ Highway ស្ថិតក្នុងសង្កាត់វត្តគរ ក្រុងបាត់ដំបង ដែលទើបតែធ្វើការសាងសង់ មានប្រវែង២,៨៤៥ម៉ែត្រ និងទទឹង៦ម៉ែត្រ ៕
