នៅព្រឹកថ្ងៃពុធ ៨កើត ខែភទ្របទ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៦ ខែសីហា ឆ្នាំ២០២០ ឯកឧត្តម ងួន រតនៈ អភិបាល នៃគណៈអភិបាលខេត្តបាត់ដំបង បានអញ្ជើញចុះត្រួតពិនិត្យការស្ថាបនាផ្លូវថ្មីឡើងស្ពានថ្មថ្មី (១៣មករា) ក្បែរស្ពានថ្មចាស់ (ស្ពានបុណ្យ) ទល់មុខអគារចាស់សាលាខេត្តបាត់ដំបង និងផ្លូវលេខ ៥០៧ និងប្រឡាយមួយចំនួនទៀតដែលការអញ្ជើញចូលរួមពីលោកនាយកទីចាត់ការផែនការ និងវិនិយោគសាលាខេត្ត តំណាងក្រុមហ៊ុនម៉ៅការ និងអ្នកពាក់ព័ន្ធមួយចំនួន។

នៅក្នុងដំណើរចុះពិនិត្យនោះដែរ ឯកឧត្តមពិនិត្យអំពីលក្ខណៈបច្ចេកទេស និងពិនិត្យរៀបចំគ្រោងស្ថាបនាផ្លូវផ្នែកខាងលិចនៃស្ពាន ដោយស្ថាបនាចាក់បេតុង និងអ៊ុតកៅស៊ូ ដើម្បីជួយសម្រួលដល់ការធ្វើដំណើរមួយផ្នែកជូនបងប្អូនប្រជាពលរដ្ឋ នៅពេលបញ្ចប់ការសាងសង់ស្ពាននេះរួចរាល់ផងដែរ។

សូមបញ្ជាក់ផងដែរថា៖ការស្ថាបនាសាងសង់ស្ពានថ្មថ្មី ទន្ទឹមគ្នាជាមួយ និង ស្ពានថ្មចាស់ ដែលមានប្រវត្តិសាស្ត្របន្សល់ទុកពីសម័យអាណានិគមនិយមបារាំង មានចំណាស់អាយុកាល ជាង ១០០ឆ្នាំមកនេះ គឺស្ថិតនៅផ្នែកខាងត្បូងស្ពានចាស់ និងនៅចន្លោះពីគ្នាប្រវែង០៦ម៉ែត្រនៃស្ពានថ្មចាស់ ត្រូវបានប្រារព្វនូវពិធីក្រុងពាលីបើកការដ្ឋានសាងសង់ហើយ កាលពីថ្ងៃទី១២ ខែមករា ឆ្នាំ២០២០ កន្លងទៅនេះដោយកងកម្លាំងវិស្វកម្ម ក្រោមវត្តមានជាអធិបតីពីឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបង និង ឯកឧត្តម ខាន់ ម៉ាណេរ រដ្ឋលេខាធិការក្រសួងសាធារណការ និង ដឹកជញ្ជូន ជាទីប្រឹក្សាសម្តេចក្រឡាហោម ស ខេង ដោយបានសាងសង់ចប់ ១០០% ផងដែរ។

សម្រាបជូនផងដែរថា ស្ពានថ្មថ្មី ដែលសាងសង់ទន្ទឹមស្ពានថ្មចាស់នេះ មានរចនាបថដូចគ្នាទៅ និងស្ពានថ្មចាស់ ដែលបណ្តោយប្រវែង ១០០ម៉ែត្រ និងទទឹង ៨ ម៉ែត្រ ហើយនឹងគ្រោងបញ្ចប់ការសាងសង់នៅខែសីហា ឆាប់នេះផងដែរ៕